Urafiki wa Cristiano Ronaldo, Mourinho ulivyofikia tamati

MADRID, HISPANIA

KUNA madai mengi ya msingi yamejitokeza kuhusu uhusiano baina ya staa wa Real Madrid, Cristiano Ronaldo na kocha wa zamani wa timu hiyo, Jose Mourinho, ulivyokufa. Wote ni raia wa Ureno.

Hata hivyo, vielelezo vya msingi vinapatikana zaidi wakati huu ambapo wawili hao wameachana njia huku Mourinho akirudi Stamford Bridge na Ronaldo akibakia Real Madrid. Hivi ndivyo uhusiano wao ulivyokufa.

Ronaldo akwepa kumkumbatia

Ronaldo alifunga mabao yote matatu wakati Madrid ikiizamisha..........
Levante 3-1 Februari 2012. Kabla ya mechi hiyo, Ronaldo alimwahidi kocha wa viungo, Rui Faria, kwamba kama akifunga mabao matatu basi atashangilia naye.

Kwa hiyo alipofunga bao maridadi la tatu kwa shuti la mbali, alianza kukimbia kasi kuelekea katika benchi la timu yake kwa ajili ya kushangilia na Faria.

Hata hivyo, Mourinho alishtukia jambo hilo na kumpita kasi Faria aliyekuwa amejiandaa kushangilia na Ronaldo na kisha kumkumbatia Mreno mwenzake huyo ambaye hata hivyo hakufurahishwa na kitendo hicho cha Mourinho cha kulazimisha kumkumbatia.

Kwa haraka haraka tukio hilo lilileta picha nzuri hata kwa vyombo vya habari, lakini ukweli ni kwamba uhusiano wao ulikuwa uko duni huku ikisemekana kwamba Ronaldo alikuwa ana tabia ya kuhoji tabia ya Mourinho kupendelea kucheza soka la kujihami.

Ronaldo ahoji mbinu za Mourinho

Ugomvi baina yao ulikuja kuwa kitu cha kawaida hata katika siku za mwanzo za Mourinho pale Santiago Bernabeu. Siku chache baada ya kushinda Kombe la Mfalme, shukrani kwa bao la kichwa la Ronaldo Uwanja wa Mestalla dhidi ya Barcelona, Madrid ilichapwa 2-0 katika pambano la nusu fainali uwanjani Santiago Bernabeu na wababe hao wa Catalunya.

Akiwa amekerwa na staili ya soka la kujihami la Mourinho, Ronaldo alisikika akiwapigia kelele wachezaji wenzake uwanjani kuwataka waachane na mbinu za Mourinho na kucheza soka la kushambulia.

Baadaye katika chumba cha kubadilishia nguo, Mourinho alimfokea Ronaldo vikali mbele ya wachezaji wenzake kabla ya Ronaldo kutoboa siri kwa waandishi wa habari kwamba alikuwa hapendi mbinu za Mourinho. Matokeo yake? Aliwekwa benchi katika pambano la Madrid lililofuata ambalo walichapwa 3-2 na Zaragoza.