KOCHA JKT OLJORO AWAKANDIA UBINAFSI WAO, ASEMA KWA SERA ZAO WATABAKI KUWA WASHIRIKI TU WA LIGI KUU!!

Na Baraka Mpenja wa Fullshangwe, Mbeya

Tabia ya baadhi ya watu kuendekeza hila, fitina na tamaa ndio chanzo cha kumaliza soka la klabu za Tanzania kuanzia ligi za chini mpaka ligi kuu.

Hayo yemesemwa na aliyekuwa kocha wa JKT Oljoro, Riziki Shawa ambaye kwa sasa amebwaga manyanga ambapo amesema wakati ikifundisha klabu hiyo kuna baadhi ya watu walikuwa na tamaa na kutaka kuendesha timu watakavyo wao.

“Kuna watu wanajifanya ile timu wanaijua sana, kuna watu wana tamaa sana, kutoka ukatibu mkuu mtu anataka ukocha mkuu, soka haliko hivyo, na hawatafanikiwa kwa misingi hiyo”. Alisema Riziki.

Riziki alisema kwasababu wao ni wanajeshi, basi wanataka kuendesha timu wenyewe kwa wenyewe na wanaamini wanaweza kufanikiwa kwa haraka, jambo ambalo ni sumu sana kwa klabu ya soka.

“Pia kuna wakati wanaendekeza ukabila, kwasababu mkubwa ni kabila lake, basi wanataka kubebana na kuendesha klabu watakavyo”. Alisisitiza Riziki.

Riziki aliongeza kuwa kila binadamu anataka sifa, ila mpira unatakiwa kuucheza kwanza na baadaye uje kuufundisha, lakini kwa Tanzania watu hawajacheza mpira na wanang`ang`ania kufundisha timu kubwa na wanashindwa kufanikiwa.

“Kuna makocha ambao ni bora sana, kocha anatakiwa kuwa mfano, ukiangalia uwezo alionao kocha Mbwana Makata aliyeaacha kazi JKT Oljoro ni bonge la kocha, tulifanya kazi nzuri, lakini kutokana na tamaa zao na kumfanyia majungu akaamua kuondoka”.

Riziki alisema ametoa mchango mkubwa sana katika maendeleo ya klabu hiyo, lakini leo hii wanaona hana jipya na wanashindwa kumthamini kutokana na urasimu wao, na kwa misingi hiyo hawatafanikiwa.

“Kwa sera zao, hila zao, fitina zao, majungu yao na kubebana kwao kutawafanya kuwa washiriki tu wa ligi kuu, mafanikio yatakuwa ni ndoto kwao”. Riziki alipigilia msumari wa moto.

Akizungumzia mipango yake, Riziki amesema kwa sasa anapumzika, lakini kuna timu zimemfuata kuzungumza naye na anaweza kufundisha hata ligi daraja la kwanza.