Yanga, Simba; Ama zao ama zetu

  

 Kikosi cha timu ya Mbeya City mara baada ya kupanda daraja, leo timu hiyo inapambana na Yanga jijini Mbey

SAHAU Manchester United dhidi ya Crystal Palace au Arsenal vs Sunderland. Shughuli ipo Dar es Salaam na Mbeya leo Jumamosi, unaijua?

Simba na Yanga zimetamba kila mmoja kwa kudai ama zao ama zetu, lakini mambo yote yatakuwa hadharani leo Jumamosi.

Vinara wa Ligi Kuu Bara, Yanga kwa mara ya kwanza tangu kuanza kwa msimu mpya wa ligi inatoka nje ya Dar es Salaam na Simba kwa mara ya kwanza inarudi katika jiji lenye Bahari ya Hindi.

Yanga, wanacheza na timu mpya yenye hamasa kubwa ya mashabiki mjini Mbeya ya Mbeya City kwenye uwanja chakavu wa Sokoine huku Simba ikiwa Dar es Salaam kucheza na timu king’ang’anizi ya Mtibwa Sugar katika uwanja wenye kapeti.

Ingawa Yanga ilikuwa ikifanya mazoezi kwenye uwanja chakavu wa Shule ya Sekondari Loyola, Dar es Salaam, Kocha wake Ernest Brandts alisema: “Nimeuona Uwanja (Sokoine), si mzuri kabisa, sijui mechi yetu itakuwaje.”

Mbali na hilo pia alisema wachezaji wake wana uchovu wa safari, lakini atamkosa kiungo wake mahiri Mnyarwanda Haruna Niyonzima ‘Fabregas’ ambaye hajajiunga na timu tangu alipokwenda kwao Rwanda kuchezea timu ya Taifa.

Brandts alisema: “Nasikitika kumkosa mchezaji muhimu kama Niyonzima pamoja na Hamis Kiiza ingawa wachezaji wengine kama, Ngassa (Mrisho amefiwa na bibi yake) na Lusajo (Realintus yupo chuo) hatupo nao kwenye safari hii ya hapa Mbeya.”

Kwa upande wa Mbeya City, kocha wa timu hiyo, Juma Mwambusi alisema: “Mpira ni dakika 90, timu yetu ni changa na Yanga ni wakongwe, nawaheshimu kwa hilo. Kama kocha nimejipanga kwa upande wangu kuona tunafanya vizuri katika mechi hii.”

SIMBA VS MTIBWA

Simba ambayo ilijificha Bamba Beach, Kigamboni, Dar es Salaam, inacheza na Mtibwa Sugar kwenye Uwanja wa Taifa.

Mtibwa iliifunga Simba nyumbani na ugenini kwenye mechi za ligi msimu uliopita na wameapa kurudia hilo msimu huu jambo ambalo limeongeza msisimko wa mchezo huo.

Wekundu wa Msimbazi wana mseto wa chipukizi kama, Ramadhani Singano ‘Messi’, Twaha Ibrahim ‘Messi’, William Lucian ‘Gallas’ na Adam Miraji watakaosaidiwa na wazoefu kama, Abdulhalim Humoud ‘Gaucho’, Amri Kiemba, Said Nassor ‘Cholo’ na Henry Joseph anayecheza mechi hiyo kwa mara ya kwanza baada ya misimu mitatu alipokuwa Kongsvinger ya Norway.