ASASI YA IRAWS – T KUSAIDIANA NA SERIKALI KUPUNGUZA MSONGAMANO WA WAFUNGWA MAGEREZANI

Naibu Mkurugenzi Mtendaji wa Asasi ya IRaWs – T, Naibu Kamishna wa Magereza Mstaafu, Dkt. Salum Chambuso akifafanua jambo wakati wa Mafunzo Maalum ya namna ya kupambana na Changamoto ya Msongamano wa Wafungwa na Mahabusu Magerezani. Mafunzo hayo yametolewa na Asasi hiyo Oktoba 11, 2013 katika Ukumbi wa Makao Makuu ya Jeshi la Magereza.Kamishna Jenerali wa Jeshi la Magereza Nchini, John Casmir Minja akifuatilia kwa makini Mada Maalum iliyowasilishwa na Katibu Mtendaji wa Asasi ya Kiraia ya IRaWs – T inayojishughulisha na Urekebishaji wa Wafungwa, Naibu Kamishna wa Magereza Mstaafu, John Nyoka( hayupo pichani) leo Oktoba 11, 2013 katika Ukumbi wa Mikutano wa Makao Makuu ya Jeshi la Magereza, Dar es Salaam.Baadhi ya Washiriki wa Mafunzo ya namna ya kukabiliana na Msongamano wa Wafungwa na Mahabusu Magerezani wakifuatilia mjadala(Picha zote na Lucas Mboje wa Jeshi la Magereza).Mwenyekiti wa Asasi ya IRaWs – T, Kamishna Mkuu Mstaafu wa Magereza, Onel Malisa akichangia hoja katika Mafunzo hayo katika Ukumbi wa Mikutano wa Makao Makuu ya Magereza, Dar es Salaam.

………………………………………………………………………….

Taasisi ijulikanayo kwa jina la “Inmate Rehabilitation and Welfare Services Tanzania” (IRaWs – T)     ya Jijini Dar es Salaam imetoa Mafunzo Maalum kwa Maafisa Waandamizi wa Jeshi la Magereza juu ya namna ya kushirikiana katika kukabiliana na Msongamano wa Wafungwa na Mahabusu Magerezani.

Akiongea katika Mafunzo hayo Mwenyekiti wa Asasi hiyo, Kamishna Mkuu Mstaafu wa Jeshi la Magereza, Onel Malisa ameyataja majukumu mkubwa ya Asasi hiyo kuwa ni kushirikisha Vyombo vya Haki Jinai ambavyo ni Mahakama, Polisi, Magereza pamoja na Ofisi ya Mwendesha Mashitaka Nchini katika kupata namna bora ya kupunguza Msongamano wa Wafungwa na Mahabusu Magerezani.

Naye Kamishna Jenerali wa Magereza Nchini, John Casmir Minja amesema kuwa Jeshi la Magereza lipo katika Maandalizi ya kuwa na Mtaala Bora utakaowafanya Maafisa wa Jeshi hilo kuweza kukubalika Kimataifa katika Huduma za Urekebishaji.

Aidha, amesema kuwa anajivunia kuwa na ushirikiano mzuri na Maafisa Waandamizi Wastaafu wa Jeshi la Magereza katika kukamilisha jukumu la Urekebishaji wa Wafungwa Magerezani.

Asasi hiyo kwa sehemu kubwa inaundwa na Maafisa Waandamizi  Wastaafu wa Jeshi la Magereza wakiwemo Makamishna Wakuu ambao wamedhamilia kutoa uzoefu wao wa Uendeshaji wa Magereza wa ndani  na nje kwa Serikali kupitia Vyombo vya Haki Jinai likiwemo Jeshi la Magereza.