Everton, Liverpool zitatesa msimu huu?

LONDON, ENGLAND

KUNA mabadiliko makubwa katika klabu za Mashariki ya England  katika misimu miwili iliyopita. Klabu nne kubwa za majiji ya Liverpool na Manchester, zote zimebadilisha makocha katika kipindi cha miezi 15 iliyopita.

Brendan Rodgers amekabidhiwa jukumu Liverpool, Roberto Martinez ametua Everton, huku David Moyes akienda Manchester United na Manuel Pellegrini yuko Manchester City. Wote wapo katika kipindi cha awali cha kuzoea maisha katika klabu hizo mpya.

Tayari mwanzo wa msimu huu katika mbio za ubingwa, kumeanza kuonyesha mabadiliko kwa upande wa matokeo. England imeanza kushuhudia kuzaliwa upya kwa klabu za Jiji la Liverpool na kuondoka kwa utawala wa klabu za Manchester.

Rodgers na Liverpool

Rodgers aliwasili Liverpool akitokea Swansea City msimu uliopita. Ameifanya Liverpool kuwa timu inayocheza pasi nyingi na kukaa zaidi na mpira.

Mpango wake unaonekana umefanya kazi nzuri hasa katika nusu ya pili ya msimu uliopita na mwanzoni mwa msimu huu.

Kuhusu ubora wa kikosi chake si tatizo, lakini swali lililobaki ni jinsi gani Rodgers ataifanya Liverpool kucheza Ligi ya Mabingwa Ulaya mwakani?

Msimu huu ameanza kwa kishindo na sasa anakamata nafasi ya pili kwenye Ligi Kuu. Kama Liverpool itamaliza katika nne bora msimu huu, Rodgers atakuwa amewajibu kwa vitendo waliokuwa wakimbeza.

Martinez na Everton

Ndiyo kwanza ameanza kazi yake na kufanikiwa kusajili wachezaji wachache katika siku ya mwisho ya usajili, hivyo ni mapema kuanza kumhukumu Martinez.

Everton inaonekana inacheza soka la kasi na kutengeneza nafasi nyingi zaidi baada ya kuwa chini yake.